versione pdf - Sardegna DigitalLibrary

80
SOS DÌCCIOS NON SUN... FAE
Fizu solu: o tottu malu o tottu o tottu ‘onu
Assiat raju! Che deris in tucca
bidu mai l’aimis a Pitzente!
In sumbreri, corbatta e pipa in bucca
si non pariat unu ‘e...Continente!
Dêt aer fiagadu mele ‘e... cucca!
Sos bestires cumponen su molente...
-nâchi an iscrittu- Ma si l’arrejonas
arroncat che a sempre, in orobonas!
De ‘inaris nde tenet in calàsciu,
domos e benes at in bidda e fora,
e calchi ‘olta ispendet a iscàsciu.
Ma de pobidda non nd’at bidu ancora,
prîte sa mama, sende solu e màsciu,
bi la pretendet de zente segnora!
Nât su dìcciu, non chie est bicchifine:
sas ricchesas cumponen su macchine.
Est custu est finas beru... ca si riccu
non fit bistadu Pitzente Marrosu,
a de comente est isimpre e pazosu,
finas lassadu b’aiat su biccu
e in prus chena lòmpere a s’afficu
de connoscher femìna a gosu a gosu!
Ca su ‘inari ‘e sos ómines loccos
si ch’andat tottu in fustes e in roccos.
Ammonestan sos Mannos: Fizu solu:
o nd’ ‘essit tottu malu o tottu ‘onu!
E Pitzente est goi: che su sonu
de padedda filada... e s’a isconsolu
si mattanat infattu a s’oriolu
d’una pobidda ‘e déghile consonu,
sa ura est chi la potat agattare.
Ma chen’alas non si podet bolare!