versione pdf - Sardegna DigitalLibrary

72
Curret a mare s’abba...
Curret a mare s’abba, notte e die,
da-e sempre, o Nina, e da’ tottue,
tales comente innanti currias tue
cun ojos de ternura accurtz’a mie,
ch’essera attesu, affacca, inoghe, incue,
fogu b’aperat, bentu, abba o nie!
Ca fis s’alenu meu e deo su tou,
su sole de sa vida sempre nou!
E sempre a sinu abbertu che su mare
t’abbratzaia che siddadu ‘e oro
e tue, nae in portu, in t’affianzare
ti m’istringhias sulena a su coro!
E mere m’intendia e re e moro,
tue reina e sirena umpare!
Ite dies d’ammaju e de consolu
che aes ambos duos sempre in bolu.
E sa ‘ucca... sa ‘ucca... unu ‘enale
de chentu accisos sos pius sobrados,
milli trainos d’abba manantiale,
mizas chentu de fogos allumados!
Che a nois cal’àteru mortale?
Sos fortunados de sos fortunados!
Como cumprendo prîte s’oro est caru,
ca est, che’ cust’amore, su prus raru!
Una mirada in ojos fit bastante
pro inchender sa die d’ermosuras,
pro mudare in ispera alluinante
de sa vida sas peus amarguras.
Deo lu poto narrer: cust’amante
at connottu ‘e su chelu sas alturas!
E si oe mi mancas... a s’ammentu
serro sos ojos... sònnio... e so cuntentu!
SOS DÌCCIOS NON SUN... FAE