versione pdf - Sardegna DigitalLibrary

228
S’esseran che a tie sas teraccas
S’esseran che a tie sas teraccas
piliesses, raspitzas, pistasolas,
sas domos nde dian ruer a sas solas
e sos palattos benner a barraccas!
Tue non bettas, non messas, ne arzolas,
ti tattas de s’anzenu e, si t’istraccas
un’untza ‘e prusu samunende piattos,
miàulas cantu, a narrer, milli gattos!
Che unu remu irroccas de galera,
non rispettas ne mere e ne padrona,
sos santos los istrampas da’ sa trona,
fintz’a sos tuos faghes a bisera!
Non miras frazu, aorru... ‘e cosa ‘ona
sempre gàrriga cheres s’istadera.
“Tantu da-e costazos -pensas tuegià
non bessit a mie!” Cara ‘e sue!
Un’atterra ti ‘essat tirriosa
e a semos t’agattes sa persone
de samben e matèria putzinosa!
Chi ti bi frighen posca su limone
e pro ti los cunzare mezus cosa
non b’apat che, alluttu, unu tittone!
E, si t’ ‘esserat tùnciu de lamentu,
felchidos in sa limba craos chentu!
Pro su chi gittu ti ch’as a s’accua
da-e sas lùscias, sas cubas, sas càscias,
ti ruan susu tottas sas disgràscias
ch’as tue e tottu cun sa limba tua
auradu a sa zente! E gai iscàscias
in s’ischire chi ne médiu e ne fua
b’at pro ti l’isfrancare cussa sorte
a tales chi t’invoches a sa Morte!
SOS DÌCCIOS NON SUN... FAE