versione pdf - Sardegna DigitalLibrary

152
SOS DÌCCIOS NON SUN... FAE
Chie filat fune pro àtere, s’istrangùgliat isse e tottu
Tue trassende de la trobeire
fis s’anzonedda nîda ‘e su fiottu,
ca ti pariat mele cun regottu
e boza aias de ti divertire!
Chie filat fune, però dês ischire,
pro s’anzenu, finit chi isse e tottu
s’istrangùgliat, ne balet posc’a prànghere,
ca prus niune nde lu podet frànghere!
S’arantzu agru faghet tzaccullittu...
como bi pensa e pónebi zinzìgliu!
T’accunorta, ti ninna su pupittu
e ti l’affianza a pettus che sustìgliu,
ca sas làgrimas de su coccodrìgliu
caldu non torran su piattu frittu!
S’ispiga si nde messat pro su ranu...
e messadu as tue... chittulanu!
Ello niune su contu t’at fattu
de cuddu sórighe imbitzadu a casu,
liccardu meda e galu mai attattu,
ch’a finitia b’at postu su nasu?
Non ses su primu, nd’ista persuasu,
ch’innanti ‘e s’ora chirchende recattu
in cussas tancas s’at chérfidu tèssere
sa trobea, ne s’ùltimu as a èssere!
Como però nd’agabba sa girella
e che pastore ti nd’ista in cuile,
ca b’at de fagher mannu su gerrile
e a chie t’at dadu cussa prella
de la campare in modu deghile!
E chi, manna, bi lugat un’istella
subra su nidu ‘ostru, carradora
de salude e de paghe a cada ora!