versione pdf - Sardegna DigitalLibrary

158
SOS DÌCCIOS NON SUN... FAE
Sa fémina est che sa mela: fora bella e intro punta
Bae chi già nde rues da’ sa trona
e falas da-e píscamu a furraju!
Non t’olvides però: chie est laccaju
tales abbarrat puru in sorte ‘ona!
Da-e cando est viuda sa padrona
nâchi ses tue su puddedru ‘aju
chi l’accunortat in su... mancamentu
e chi l’assistit donzi pensamentu.
Bonu proe ti fattat! Ma su biccu
mira ch’in cuss’azardu non bi ponzas!
Ca, a cant’isco, in su matessi afficcu
b’at unu mere chi... a fragu ‘e monzas
ischit resare che preide ‘e ticcu;
non timet brigas, trassas o birgonzas
ne d’impittare leppa o archibusu
cun chie l’istrobberat su.. pertusu!
E pùlighe no est un’istoccada...
mascamente s’arrivit a s’accua!
Tue già l’ischis: sa petta furada
est pius saborida de sa tua!
Como ses paba... ma cuss’acconcada,
giagh’àrminat donzunu lana sua,
chi non ti costet timo dannu o morte
ca chertas contr’a chie est pius forte!
Sa fémina -t’ammenta- est che’ sa mela,
cantu est bella foras intro est punta!
E cuss’ ‘attia no est bianca... vela,
ch’at milli mares (si non crês, pregunta!)
attraessadu cun d’una bandela!
Su brou, inte’, cun sa trudda pertunta
non si podet servire... a baju e a murru!
Duncas, furraju, dês giambare... furru!