versione pdf - Sardegna DigitalLibrary

182
Su traittore no abbaidat mai in cara
Àrtzia sa cara e mìrami in ojos,
s’est chi ‘alet ancora sa mirada!
Ue che fis nottesta? In sos trobojos
ses rutta galu ‘e chie, o iscabada?
S’ischeras cantu ti apo chircada
peri pèlcias, calancas, calafojos!
Intesu m’an sa Luna e sas istrias
urulende sas duras penas mias!
Perdet sa coa nâchi su matzone,
ma non su vìsciu... ed est beru gai!
Deo l’ischia chi non fis anzone
dulche e maseda... ma, mai e poi mai,
podia pensare chi tenzeras, ahi,
arte e malesas de un’iscurtone!
Accò prîte, in sa vida e in s’amore,
mai àrtziat fàccia chie est traittore!
Fit beranu, t’ammenta... e a unu ballu
t’abbojei che abe in chirca ‘e mele:
subra palas gighias un’isciallu
ruju, ‘e seda, e d’oro unu... nighele
appuntadu in pettorra. E, como, ajallu
s’accisu ‘e tando tramudadu in fele!
Ne caddu in maju, ne fémina in festa!
-narait mama cuntresta-cuntresta-
Eja...e chie si leat de amore
-an iscrittu- d’arràbbiu si lassat!
Narat “ohi” chie tenet dolore...
e s’est dólima ‘e cuddas chi non passat
finit chi perdet sonnu e onore!
Faghìmubi una rughe. Chie trassat
contr’a sos suos, s’est ch’at malu vìsciu
non lu perdet manzanu! Ohi giudìsciu!
SOS DÌCCIOS NON SUN... FAE