versione pdf - Sardegna DigitalLibrary

10
Narat su dìcciu...
(Ottavas a marrania... chena risposta)
Treghentostrintatres nd’as postu in riga,
Pàulu, ‘e dìccios in NARAT SU DICIU,
e donzunu, che santu intro su nìcciu,
est molimentu ‘e sabiesa antiga!
Como però, addaghi ses ispícciu,
ti dao deo un’àtera fadiga
chi tue e tottu ‘ettadu a s’ilventa
m’as unu die in Casteddu, t’ammenta!
Ischinde ch’a s’ottava tenzo improntu
(ma non l’isterro “a bratzos” che a tie)
m’as nadu a marrania e rie-rie
che-i su grodde finghéndeti tontu:
-S’est ch’a improvvisare non ses prontu,
giogamos, o Rubattu, deosie:
Ordinza calchi rima e mi l’imbia,
c’as aer pronta sa risposta mia!-
“E’ su tema?” -ti nêi. “Faghe tue!”
-m’as rispostu cun ojos de dultzura-
Amigu ‘onu, est donu ‘e Natura
sa Poesia, inoghe che in tottue,
ne in manos sa pinna amos segura!
Siat comente... it’ ‘alet chi mi cue!
Si d’ambos duos est sa Musa amiga,
giogamos... già est dulche sa fadiga!
Pro ch’in sas tancas de sa poesia
non tucchemos però a brìglia isolta,
faghimos goi: da-e sa regolta
ch’as tue iscrittu, de sabidoria
leamos calchi dìcciu, a bolta-’olta,
e l’isterrimos, postos che a porfia.
E ite nâs? Ti paret pensu ‘e giudu?
A cosa fatta non balet impudu.
SOS DÌCCIOS NON SUN... FAE
(14 ‘e Trìulas de su 1994)