versione pdf - Sardegna DigitalLibrary

186
SOS DÌCCIOS NON SUN... FAE
Chie narat su chi cheret, su chi non cheret intendet
Chie narat su chi cheret -própriu gaisu
chi non cheret intender intendet!
Si si nât sàbiu li nân chi bi pendet,
s’est chi trabàgliat chena s’arrêr mai
iscòbiat ch’est mandrone o chi non rendet!
Si campat che mischinu in arguai
in iscassia ‘e benes e d’affettos
finas l’aggiunghen ch’at milli difettos!
S’est che anzone chéssinu e masedu
dulche lu pintan o maccu che loa.
Si lompet primu s’agattat in coa,
s’at binu forte, in cuba b’at aghedu.
S’est pobiddu chen’àteru meledu
ch’at un’amiga l’appitzigan... noa!
E s’at muzere chena tacca o neu
li nân beccu, chena timire a Deu!
Nât su dìcciu:-A chie faeddat male
(ma no est sempre ‘eru, malaittos!)
sa limba si li segat in casciale!
S’esserat gai, a cussos appittos
appicconiadu cal’ómine, cale,
aimis bidu? A mezus impittos
si fit boltadu, ca accoglit malannos
chie sèmenat males chin ingannos.
E su connottu un’àteru ammonestu
galu nos porrit:-Non pagat in lardu
su Mere ‘e susu, ma pagat a tardu!-
E iscat puru chie a malu sestu
ispràmminat malesas e guvardu
mai si mustrat: at a bider prestu
ch’a prangher e a rier, est deasie,
toccat a bolta-’olta, a die a die!