versione pdf - Sardegna DigitalLibrary

8
SOS DÌCCIOS NON SUN... FAE
Cando si tenet su ‘entu est pretzisu ‘entulare
(Intregu)
Pàulu caru, amigu coriale,
si mi l’atzettas, custu mattuleddu
t’offero ‘e rimas in sardu faeddu
brotadas, che bena manantiale,
tottu paris in custu istadiale
caldu e alluttu, a sa moda ‘e Cubeddu,
de Pirastru, de Còntene e de Piras
ch’amas a tales ch’a boltas nde giras!
Cheriamis giogare... oh impícciu!
cun sos treghentos e prus díccios tuos
chi as regoltu in NARAT SU DICIU!
E imbiadu ti nd’aia duos
de “nigheleddos”, pensende ch’ispícciu
mi risponderas. Ma bidu, a concluos,
chi fis malu a sighire, apo pensadu:
-Cussu ‘e trabàgliu est che saccarradu!-
Ma deo fia in tira... e iscurrizare
in cussas tancas cheria cuntentu,
ca b’at chie at nadu chi ‘entulare
est pretzisu addaghi b’at su ‘entu!
E fattu apo gai... accoti chentu
de cuddos “nigheleddos” tott’umpare,
intregados a tie, amigu ‘onu,
ch’amas s’olostru e s’ílighe a cunsonu!
Tue biadu, c’as àpidu chie
istimare t’at fattu sa Natura
fin’a cumprender chi non b’at cultura
foras d’Issa! Cant’assimizo a tie!
Gai fit babbu, ch’a notte e a die,
finas in rima, cun puntíglia e cura,
sas criaduras -tottu- fattu amare
m’at de sa terra, de chelu e de mare!
(14 de Austu de su 1994)