versione pdf - Sardegna DigitalLibrary

20
Crabittu rassu brincat in sa mandra
Crabittu rassu brincat in sa mandra...
ca già li curret s’ozu in sos trippales!
A cadramìncios peri sos pasciales,
lìeru ‘e travas, trobea o bilandra,
da-e chentales s’istat a chentales,
ne li friet in lumbos sa malandra!
Frittu non timet, ne bentu, ne basca,
ma finas pro a isse accùrtziat... Pasca!
E no est festa -cussa- chi che colat...
c’antzis proite s’abbizat, mischinu,
allevadu l’at s’ómine a chessinu!
E daghi, presu in ancas, l’ispojolat
chie mai creiat che Cainu,
de sos runzones ch’at non si consolat!
Bélidat che traittu pro su ‘anzu,
bramende che su corru ‘e s’ ‘ider lanzu!
Cantas persones che’ cussos, s’ischeras,
Pàulu caru, connosco e... crabittas!
Sempr’a mesa a pettorra, mai chittas,
untas sas manos, sestende violeras!
E si, a boltas, nd’arrejono ‘e veras:
Chentu concas -mi nân- chentu berrittas!
Moralista orijudu! E pensa a oe!
Màndiga, buffa, futti... e bonu proe!
E calicunu finas... ohi, ahi!
m’at nadu in cara, in prus chen’impudu:
Si campat una ‘olta... o non est gai?
E daghi crebas, non crebas... ossudu!
Giàganu sempre, preìderu mai!
acco’ sa sorte tua, tostorrudu!
As istudiadu a ite? Pr’esser mastru?
Ma... da-e chercu non bessit ozastru!
SOS DÌCCIOS NON SUN... FAE