versione pdf - Sardegna DigitalLibrary

166
S’amore noa che catzat sa ‘etza
Che su pertunghefustes a sa gianna
fit tzoccheddende ‘e su duttore ‘e ‘idda
Giagu su toppu da’ un’iscutta manna,
cun d’unu coinzolu de ambidda
de porrer in regalu a sa pobidda,
e, sende pustis a brujore ‘e... canna
per bia ‘e sas murenas unfiadas
pro l’ordinare duas, tres pumadas!
Finas aiat de li dimandare
calchi mistura pro una... puddetza
chi da-e sos pertusos de sa retza
li fit fuida sèndeche a piscare!
S’amore noa che catzat sa ‘etza...
l’aiat iscrittu primma ‘e s’avviare
cudda cun d’un’agontzalabiolos!
Ma non fin cussos, no, sos oriolos!
Già nde fit recuida a su puddarzu
penentida che sempre, amore-amore,
a li narrer chi sa neghe ‘e s’arrore
fit sa fattura de calchi majarzu!
De piscare in rieddu su nassarzu
como nde fit istraccu e-i s’onore,
pro cantu amiga esserat non muzere,
no est abba chi mudas a piaghere.
Sas calches non si ‘àlian volenteri...
e Giagu aiat troppu agguantadu.
Nât su dìcciu:-Chie bramat piscadu
cheret chi si l’infundat su paneri!
Ma su vìsciu, dagh’est raighinadu,
no est petta chi segas in tazeri
ma durat fintz’a morrer, corriattu,
móssiga e ràffia che cane cun battu!
SOS DÌCCIOS NON SUN... FAE