versione pdf - Sardegna DigitalLibrary

114
Sa mela punta in s’àrvure non durat
Sas crabas andan da-e punta in punta
e-i sos cascos da-e ‘ucca in bucca!
E pro ti fagher mungher, bella cucca,
tuccas tue a inue? E pustis munta?
Iseriada! Si non benis unta
nâchi ticchìrrias che una carrucca
e isciumas che brou ‘e petta rassa
ca cheres pan’ ‘e póddine e pabassa!
Sa mela punta in s’àrvure non durat
e nesigada galu pares tue!
Narrer ti dia cherrer:-Mezus fue,
ca solu dannos cuss’arte procurat!
E maladia est chi non si curat
cun sùlfaru e cun ràmine! Una nue
pìghida est cussa che-i su trumentu
chi carrat a istròscias abba e bentu!
E, pustis rutta, da’ sos ch’as attattu
sas còscias isperriende a fortza o a gosu
cando pagada e cando a su barattu,
non as a bider mai carignosu
un’oju de ternura o lastimosu
nessi un’abbratzu! E tandu su ch’as fattu
l’as a intender che ispidu in pettu...
ma a cosa fatta non balet penettu!
Pensabei, si tempus b’at ancora,
ca nât ladinu su dícciu:-A su frìere
(mai siat però!) amos a rìere!-
Chi non t’avrescat -nar’eo- cuss’ora
e si serverat su ‘e ti l’iscrìere
(Deus lu cherfat e Nostra Segnora!)
custos versos t’intrego... cun sas uras
ch’apas sorte pro cantu in mundu duras!
SOS DÌCCIOS NON SUN... FAE