versione pdf - Sardegna DigitalLibrary

88
Su puddu a mesanotte, zente morit!
Fin duos meses chi Nofre ‘e Mamone
a bidda non falait da’ cuile,
chi drommiat in perra ‘e giannile,
bruttu e tristu che gianna ‘e presone.
In palas fittianu su fusile
e sa leppa in chintu pendulone.
Li mancaiat Moro, ca impiccadu
l’aiat in d’un’ùlumu agattadu!
A timer non timiat, ca de atza
nd’aiat pro nde dare, ma in suddu
fit pro su fizu... a boltas in catza
non b’esserat bintradu finas cuddu!
E a mesanotte, che corfu ‘e matza,
finas intesu aiat su puddu
cantende in su puddarzu e l’ischiat
chi fit signale chi zente moriat!
E accurtzu a sa Luna un’isteddu
b’aiat puru... e sos dìccios antigos
tantos teraccos, tantos inimigos
avvertin finas. Inintro ‘e cherveddu
unu nòmene... unu... su ‘e Taneddu,
chi da’ sa coa de sos crabufigos
podiat lòmpere a s’Ìscia ‘e sa férula
approfettende de sa notte ‘e néula!
S’appostesit in pinna a unu roccarzu
e l’isettesit a fusile in manu.
Poi ‘e calch’ora, acco’ su crabarzu
botti-lébiu, in caratza. -O su fulanu,
-nêsit Nofre- ses tue su dannarzu
chi mi devet bocchire? Cras manzanu
t’an a agattare in s’ùlumu de Moro,
cun custa balla in prus intro su coro!-
SOS DÌCCIOS NON SUN... FAE