versione pdf - Sardegna DigitalLibrary

170
SOS DÌCCIOS NON SUN... FAE
Su maridu contareddu faghet sa muzere ladra
Da’ cando giubilladu s’est Toeddu
a Massiana non lassat in pasu:
in donzi istampa che mintet su nasu,
die e notte l’inghiriat che catteddu,
li contat pane, ‘inu, ozu e casu,
chen’ischire chi daghi est contareddu
su maridu, est ladra sa pobidda...
e cust’’alet in Bultzi e in cada ‘idda!
E mancu male ch’est fémina ‘e giudu
Massiana e bona fainera,
si no si che fit àpidu corrudu
e affustigadu a finis de carriera
su marisciallu nostru tostorrudu
e forsis finas chena... Cabigliera!
Siat comente, su ‘addine nou
li fit faghinde su cherveddu a brou!
E pro cantu esserat pasciesciosa
e-i sa limba l’ischerat trattènnere,
sos murrunzos de cuddu non fin cosa
de ch’ingullire e nde faghian bènnere
sos minuzos a bucca! A si rentènnere
fit impresa sempre ‘e pius pesosa
e gai calch’impropériu a Massiana
che li ‘essiat fintz’a malagana.
Unu die, che foras de rejone,
“Cagassiccu” li nêsit a su... mere
e cuddu, in iras, crêre o non crêre,
s’ ‘estesit sa divisa e a presone
che la cheriat gigher, de persone,
pr’offesa a... s’Arma! Brigas de muzere
cun maridu sun de custa tenea:
duran da-e su lettu a sa cadrea.