versione pdf - Sardegna DigitalLibrary

230
Tue ses Canu e che cane ‘e loru
ti nd’istas tenta-tenta e fiaga-fiaga,
mustras sas dentes a chie in sa giaga
ti s’appresentat o s’istat in s’oru.
Ma si b’apporrin una tatza ‘e soru
giambas umore: atzettas sa... paga,
ti càglias mudu che catteddu ‘onu
e mai s’ ‘idat su primu padronu!
Giogan sos che a tie a s’angalitta:
unu pede inoghe e unu incue!
Ma a chie est cane d’isterzu che tue
li ponen, primm’o poi, sa gangullitta
o a crastos l’ischitzan sa cabitta
e che la frundin, Deus ischit ue!
Pro chi non timas perunu nappile,
bae chi nde lu perdes su facchile!
Ma ses gai... e non giamban natura
sos ch’an de Giudas sas malesas pari,
ancu ti ‘endan pro mesu ‘inari,
ca a narrer trinta est fora mesura!
Ti nde tiren sa limba a istratzadura,
sos ojos cun sa sula, ‘e fari-fari
t’imbuttan, fintz’a lomper a crebare,
sa ‘ucca e-i sas pinnas de su nare!
Chi t’impalonen pustis da’ persegus
e ti porten per bidda in pultescione
e unu batzinu da’ onzi balcone
ti ‘ettan susu ‘e pìsciu de pegus...
e siat custa s’ùltima orassione:
-Tue fis Canu e canes cun tegus
nde creben chentu ‘e cussa manera,
sian de loru, ‘e giaga o perdighera!-
Tue ses Canu...
SOS DÌCCIOS NON SUN... FAE