versione pdf - Sardegna DigitalLibrary

66
A chie at conca non mancat berritta
A chie at conca non mancat berritta...
e de conca nde tenet tiu Cadone
s’est ch’a improverzu li naran “Concone”
e, sos prus bonos, “Conca de giorritta”.
Como est betzu e in perra de contone
si nd’istat séidu in d’una banchitta
tra ammentos e ilventos d’una vida
inter sulcos e gherras consumida.
E a donzi istérrida de contu
bos ammanizat su dìcciu a puntinu,
abba-abba -nât issu- binu-’inu
pro nd’ischire, si no... fuste a su tontu!
Chie andat cun sàbiu -muttit prontubenit
sapiente... e custu est ladinu.
E cuddos nd’ ‘essin galu da’ camurros
ch’assazan pane da-e sette furros!
Siat comente... ammonestat sintzeru,
e mascamente a calchi conca crua,
chi donz’àinu at sa vertude sua
e merìtat rispettu e cunsideru.
Ca frades semus tottu de abberu,
sende sos fizos de s’eterna Frua!
E si t’ammustrat sas manos gaddosas:
-Tribàglia -ti nât- e gai gosas!-
De sa gherra, -ti nât- ca l’at connotta,
chi la perdet fintzas chie l’at bissa.
Cun su ‘inari a non ponner cotta,
ca est cun su dimòniu a narrer missa!
A su carignu e no a s’atzotta
siat sa mente die e notte fissa.
E chi lasset donzunu bona fama,
ch’est doda ‘ona... che basu de mama!
SOS DÌCCIOS NON SUN... FAE