versione pdf - Sardegna DigitalLibrary

148
Sos pensamentos pones pilos canos
“Sos pensamentos ponen pilos canos...
-fit nende Luisicu a sa muzeree
non b’at chie, teraccu o mere,
fuat a custa leze ‘e sos umanos!
Ca sa ‘errina ‘e calchi dispiaghere,
de calchi suddu o de tempos metzanos
che l’allizat a cada siat zente
finas a che l’ ‘istruer coro e mente!
Capitadu t’est d’ ‘ider a babbai,
su sìndigu ‘e ‘idda, a duttor Tanca?
E ite no at issu, a dresta e a manca?
Domos, poderes, cantu non nd’at mai
àpidu niune! E galu sa Banca
nâchi est sa sua! E como est gai...
che un’istrigliafenu in assimizu,
tott’a pijas, tzumbosu, ‘e malu chizu!
Su prenettu ‘e sa fiza pius manna
(sa chi ch’est in América istudiende)
l’est, mischinu, sos mermos consumende
ch’est approbe a ch’ ‘essire a pês a gianna
da’ domo sua! Nâchi est... allevende,
chen’ischire chie cartùccia in canna
l’at postu e chi a bidda ‘e recuire
mancu a morta nde cheret ischire!”
“Mai andat sa petta chen’aggiunta,
Luisi’! Non s’agattat parentadu
ue non b’apat calcunu iscoadu!
Incue bi nd’at una ‘e mela punta
in mesu a su muntone seberadu!
Cosas de mundu! Ne balet pregunta!
Ma nâli a su duttore chi sa cura
est in s’abbratzu ‘e cudda criadura!”
SOS DÌCCIOS NON SUN... FAE