versione pdf - Sardegna DigitalLibrary

140
SOS DÌCCIOS NON SUN... FAE
Sos maccarones frittos sun pius saboridos
Como fimis da’ meda chen’intender
lereddas de campanas a succuttu
in custu burgu ‘e viudas, de corruttu!
A chie est toccadu custa ‘olta a render
s’ànima a s’Eremigu? E a coro alluttu
a chie a piànghere e a pretender
àteru sàmbene, àtera vinditta?
Bidda ‘e mortos, erèscia malaitta!
Su fele est malu meda a mastigare...
ma, inoghe, a cherrer ingullire
un’isgrabbu est a si declarare
chena meuddos, zente d’abburrire!
Est neu e birgonza a perdonare...
e un’altzada ‘e conca su ‘occhire
no est mai in cust’inferru ‘e morte,
ma s’eredu fittianu de sa Sorte!
Sos maccarrones -nât calcunu a galasi
sunu frittos sun prus saboridos!
Sos pinzos de su mortu remunidos
los tenimos finas a s’ora mala
de lu tirare a su mortore a pala!
E s’at custu parentes atzuridos
chi sigan sa perricca a moda antiga,
pro chi de rughes s’allonghet s’istiga!
Ohi samben furriadu a su barattu!
E ne si ch’ ‘idet de paghe intertantu
un’avréschida! Su peccadu fattu
non si ch’andat in bidda chena prantu!
E sighimos... sighimos a ispantu
a nos torrare paris su piattu!
Succuttade, campanas, succuttade!
E bois, mamas sardas, attittade!