versione pdf - Sardegna DigitalLibrary

74
Chie non timet no est òmine
Chie non timet -naran- no est ómine...
e deo che sa frea timo a mie
cand’a notte non drommo e penso a tie
chi mancada mi ses in d’unu dómine!
Ca duos nd’at faladu, unu perómine,
de rajos, a unu tzoccu, cussu die!
Ne s’esser galu in bida m’est cunfortu,
s’est chi mi trazo, in mes’a bios, mortu!
Su sole ‘e mesudie est luna fritta,
su risu ‘e sos piseddos tintieddu,
su cìulu ‘e sas aes un’appeddu
berrinosu che boghe attitta-attitta!
E de s’espe terranza in su cherveddu
sa mùida sighida e malaitta!
E unu manu addae, carignosa,
chi mi nât:-Beni... curre... ti reposa!-
E-i sa ‘oza est una... una ebbia:
de lòmpere a ue as fattu nidu
e in su sulcu tuvuccu ‘e s’olvidu
de mi perder pro sempre e chena ria!
E at a esser gai, ànima mia,
non b’at duda... e su coro istasidu
de si lograre at aer su consolu
pensende a tie in s’ùltinu ‘olu!
Cun su tempus sa chera ‘enit a fogu...
e cun su tempus no impitto arminzu;
e si frazende si ch’est s’istuppinzu
finas mi diat pàrrere unu giogu,
unu pàsidu dulche liscighinzu,
su lòmpere a s’eternu disaogu
ue ses tue in ténnaru isettu...
che cando m’isettais in su lettu!
SOS DÌCCIOS NON SUN... FAE