versione pdf - Sardegna DigitalLibrary

222
Cando sa Pasca at a ruer in Maju
o nàschere su Gésus in Austu,
a petta crua torrare s’arrustu
o a pitzinnu ‘enner su bisaju,
solu tando ti falet unu raju
e cunfundas sa chena cun su ‘ustu,
sa cattedda chi b’as cun sa muzere,
cadrea cun brajeri pro ti sêre!
Daghi su trigu at a tuddire ranos
maduros che arantzos e de ferru,
cando as a bider duos tres cristianos
poi mortos torrados da’ s’inferru,
cantos semus in Terra tottu sanos,
su mundu chena làccana e abberru,
tando ebbia sa runza e sa pigotta
sa persone ti l’iscarenen totta!
Dagh’’ideras sos pisches da’ perissos
da-e mare brinchende in sa sartàina,
a mizas sas frommigas in andàina
pighèndeche a sa Luna tres ôs frissos
o sas benas catzende latte d’àina...
tando chi ‘enzas cun tres giaos fissos
a una rughe appiccadu d’attarzu
ch’at caentadu unu frailarzu!
Cand’annotas ‘oltadas in coccois
pasculende sas monzas in cumbentu
o in su coghepetta a fogu lentu
sos prìdes ‘oltuléndesi e a ohis,
tando su corpus tou pro appentu
ti bicchen aes, terpes e babbois
e in dogni pertusu pro maganza
fattat su bugnu sa ‘espe terranza.
Solu tando ti falet unu raju!
SOS DÌCCIOS NON SUN... FAE