versione pdf - Sardegna DigitalLibrary

226
Narrer m’as fattu su chi non cheria!
Lêndemi a limba, a su trassa-trassa,
narrer m’as fattu su chi non cheria...
gai so deo como sa bagassa
e tue nîda e netta che Maria,
deo sa ladra, sa mala, sa frassa,
tue in nìcciu che santa bona e pia!
Males ch’apas, Toie’, e a puntinu
pro cantas untzas pesat su terrinu!
Malaitta già ses che pe’ de beccu,
però non ti si paret da’ sa chiza.
Ma si b’at d’ilventare calchi attreccu
sa limba ‘e terpe chi as a forchiza
non s’impudat d’istare appiza-appiza
finas a b’agattare calchi peccu!
Ancu, tando, ti falat unu raju
o chi t’allizes che àpara in maju!
Addaghi ses che sùrvile ‘e inferru,
d’inghènias e fattuzos su ‘enale,
pro no ischire ne chie e ne cale
ancu sos ojos t’ ‘oghen da’ s’inserru
e los impitten che pedras de sale!
Sos canes t’accumpanzen a s’interru
ischirriolendetila sa persone
a tìrria pro si gigher un’ ‘uccone!
E cantas coglionadu as che a mie
nênde sole a sa luna, abba a su fogu,
un’attittu ti canten rie-rie
che s’esseran faghìndelu pro giogu
e in sa losa b’iscrian:-Su logu,
o tue chi legges, est custu ‘e chie
vìvidu at che dimònia e tale est morta!
Rùspiabi susu... e prus d’una ‘orta!-
SOS DÌCCIOS NON SUN... FAE