versione pdf - Sardegna DigitalLibrary

190
Cun su tempus s’imentigat su dolu
A prangher custa ‘olta Madalena
già l’at prantu su cortzu ‘e su maridu,
ca fit pobiddu raru e, gratia plena,
non che su primu legu e arrajolidu!
E fit -sa sua- boghe ‘e filumena
ch’a pibios a s’inghìriu ‘e su nidu
chircat sos fizos chi, sorte dannarza!,
l’at mortu sa colora puzonarza!
“Tue sí chi fit lizu, Tzitzu meu,
sàbiu che ranu ‘e trigu, aorradore,
tottu domo e trabàgliu, unu chereu,
forte che trau, ómine d’onore.
Su sole ch’est caladu, oddeu, oddeu...
como cun chie lu chirco s’amore?
Narrer poto chi una bona prenda
balet meda ‘e pius d’una sienda!
Disdicciada! E cal’àteru ‘anzu
ordivinzende m’est galu sa sorte?
Accomi torra ‘attia, chen’affianzu,
e finas deo in trànsitos de morte!
Non podet esser chi mi nd’accunorte,
ca fit maridu, amigu e cumpanzu
Tzitzu ‘e Melas, s’ùnicu consolu!
Nân: cun su tempus s’olvidat su dolu!
Mezus morta che a perder s’affettu...
mezus morta, Tzitze’, intr’ ‘e su mese!”
Li tunciesit sa fiza ‘e primu lettu:
-Faghe sas ficcas, ma’, s’est chi bi crêse!
E l’agatta unu neu, unu difettu!
Appoi ‘e duos benit su ‘e trese...
e chie at bon’alenu che a tie
l’ischit chi pigat sole cada die!-
SOS DÌCCIOS NON SUN... FAE