versione pdf - Sardegna DigitalLibrary

30
Chena ‘inari non si cantat missa
“Chena ‘inari non si cantat missa!”
-deris m’at nadu in su tzilleri ‘e Brotu
unu mastru ‘e muru, mesu cottu,
cun su ‘entone untu ‘e matzafrissa,
addaghi de mi pònnere un’accottu
li nêi in su cosciale ‘e sa pidrissa-
“Ello, vostè, non l’ischit ch’in debadas
mancu dana pius istutturradas?”
“Emmo chi l’isco... e mi paret giustu.
Ma regalias non nd’apo pretesu!
Benis a zoronada o in aggiustu?
Chistiones non nde cherzo pro su mesu.
A mie m’andat bene cudda o custu.”
“A zoronada.”. “A cras manzanu, intesu?”
E, su di’ infattu, accollu puntuale
a sas otto tzocchende su portale.
S’ausentat sos trastes a cunsonu,
faghet s’impastu... e sestat a puntinu.
A sas deghe mi nât:-O su padronu,
non si nde buffat inoghe de ‘inu?-
“Cantu nde cheres?” -rispondo- “‘E su ‘onu
unu fiascu -nât isse- ‘e vermentinu.”
Bi l’ ‘atto e, pustis pagu:-A su diàmine,
in custa domo si morit de fàmine!-
Cumandat duos panes e, pro aunzu,
nâchi l’aggradessiat suppressada.
Bi los dao... e nd’istudat su deunzu.
A cumpridura nât:-Sa zoronada
est trintamiza... già est tribulada!-
“Bìndighi! -li mutt’’eo- E a murrunzu
cuddu:-Ello comente?- “Prite mai
panes, binu e aunzu costan gai!-
SOS DÌCCIOS NON SUN... FAE