versione pdf - Sardegna DigitalLibrary

50
Iscuru a chie naschet in mala luna
Che santu chena festa fit Nigola
séidu a manu in barra in su giannile,
ma sos cherveddos che fin in sa tola
de Sant’Àrvara, ue a s’impuddile
aiat dévidu isterrer s’arzola.
Tres piseddos sutt’a su campanile
agguantaian ancora gioghende
a bòccias de istratzu, abboghinende.
Unu lampizu... duos... pagu attesu
e rodulende calchi tronu infattu.
“Cras s’isfaghet su chelu a disbarattu!
Ello, non mi l’ischia... finas Gésu
est contràriu a sa terra! Mai attattu
chi s’ ‘idat su massaju! Amos cumpresu:
massaju cheret narrer disfortuna!
Iscuru a chie est nadu in mala luna.
Ràndine, nie, abba, fogu e bentu
paret nos sian da’ sempre fedales.
Nois santos in corte parinales
non nde tenimos -cust’est s’iscarmentu!e
crebamos... e pro beffe e turmentu,
de mala morte tra mizas de males.
Si Deus non pagat su sàpadu ebbia,
e cando incunzat, nâ’, sa massaria?
Coltz’a s’arzola chi timet fromija!
-nât unu dìcciu- Emmo... e cussu esserat,
addaghi bundit s’ispiga e avverat,
su dannu nostru e-i su pija-pija!
Santu Sidore a-i cuss’orija
(ca crêt calcunu chi nos cunsiderat)
surdu dêt esser che craba ‘e monte
e finas isse che grunat sa fronte!”
SOS DÌCCIOS NON SUN... FAE