versione pdf - Sardegna DigitalLibrary

172
Chie parat orija in gianna anzena
sos males suos intendet
Chie parat orija in gianna anzena
sos males suos intendet sovente
e cantu ‘alfat su dìcciu e comente
como già l’ischit comare Millena
chi, sighende sas trassas a Pitzente,
s’amoradu ‘e sa fiza, a ora ‘e chena
assegus s’est cuada ‘e sa ventana
de sa sorre de cuddu che fulana.
Ischire si fit fàula cheriat
su ciarameddu ch’aian bogadu
subr’a su ‘énnaru e chi naraiat
chi fit... fiaga-’unneddas patentadu
e ch’a su bicca-bicca s’istaiat
cun sa pobidda de un’avvocadu
chi pro mezus cuare sa conchista
si l’aiat leadu pro autista!
E intesu nd’at una d’acceretta
chi postu l’at su coro in mal’accossu;
ca si est beru chi non gighet ossu
sa limba segat cussu e-i sa petta:
Filumena non fit fémina... netta
e pro Pitzente non fit bonu mossu!
A cheja già b’andait donzi die
ma già l’ischiat issa pro a chie!
Ne boe in binza -narain sos Mannosne
padre in domo! Bi cheriat cussu!
Mezus a los prevenner sos ingannos
prîte s’ ‘uccone, daghi est troppu russu,
campare non ti lassat medas annos!
E posca a cudda li piaghet su... lussu
e un’isciafferreddu che s’insoro
non la podiat servire in prattos d’oro!
SOS DÌCCIOS NON SUN... FAE