versione pdf - Sardegna DigitalLibrary

142
Maccos e maccos s’intenden a pare
Appitzigadu, che musca a malandra,
si nd’istat Per’Antoni a sa teracca
die e notte, faghinde sa... chilandra,
ca cunfidèntzia l’est dende sa macca!
Si sighit gai, tacca poi tacca,
isse e tottu si sestat sa bilandra!
E inoghe est su dìcciu a faeddare:
maccos e maccos s’intenden a pare!
Sa lande, in gana, già paret castanza...
e segnoricu est finas famidu
s’est ch’a trint’annos non tenet cumpanza
e de fémina pilu no at bidu!
Imbetzes issa, ch’est totta maganza,
mes’ispettorinada a su lambridu
si li presentat e, in l’ ‘ider ruju,
s’altzat s’ ‘unnedda finas a benuju!
Si rattat su cambutzu e un’ojada
bettat a Per’Antoni, chi in suores
s’isfaghet tott’in s’ora, e ismalisciada
li nât chi si l’intendet a dolores.
“Ti lu frigo ‘eo! - muttit in buddores
su donnichellu. Ma, a s’impressada,
furriat a foras cudda, che timende,
e isse infattu sempre saliende!
Recattu non b’at malu a sonu ‘e matta
e ue non penètrat sa femìna
su diàulu non lompet paris patta!
E finit ch’a manzanu o serentina,
in binza, in s’istalla o in cantina
s’an a accorrare e... a cosa fatta
sa teracca at a benner segnorica,
cherfat su mere o fattat sa ficca!
SOS DÌCCIOS NON SUN... FAE