versione pdf - Sardegna DigitalLibrary

188
De pedde mala non nde morit
Pàulu caru, sos de Terramanna
che sos bisajos insoro antigòrios
sos imbeleccos sighinde notòrios
t’intran in domo chen’abberrer gianna
e muitzos, cun trassas e illòrios,
ti lassan nudu e póberu in canna!
E non ti ‘oltes, che cane a furone,
ca sun tziviles... e nâchi an rejone!
Ca Roma est... Roma, a primma che oe,
“caput mundi”, mere soberana,
Olimpu de sas Musas, tottas noe!
Issa tesset, che bona filonzana,
sa sorte tua, mia... a bonu proe!
Tue de nudda ti lees mattana
ca già b’at chie ti ballat in coa!
Peccadu ‘etzu, penetèscia noa!
De pedde mala non nde morit, raju!
e su vìsciu non perdet mariane!
Passat su tempus... e tue nd’as aju
d’isettare mezoros da’ chie est cane!
Como ‘e sa limba, che mossu ‘e pane,
ca cheres esser sardu e non laccaju,
ti negat su dirittu a marrania!
Ma non s’agabbat cue sa porfia!
A mòrrere che piogu in cosidura
tue non t’assuggettas e ne deo
e ne sos Sardos, ch’a sa malaura
sun avvesos da’ sempre! E ca bi crêo
ch’est galu custa un’ateruna fura
de sa ‘ídriga ‘e Roma, non m’arreo
d’abboghinare cun tegus a tottu:
-Torremus a sa limba ‘e su connottu!-
SOS DÌCCIOS NON SUN... FAE