versione pdf - Sardegna DigitalLibrary

176
Sos res non pagan pius buffones
Appitt’a tatzas Istene e a trudda
s’istat che cane in tratta notte e die,
ne s’accunortat s’est brou ‘e chibudda
su chi l’offerin, no importat chie!
«O primulatte -bos nât isse- o nudda!
-coglionèndeche a tottu e rie-rie-
Deo su mezus sèbero e, per Deus,
in custa domo ch’incontro su peus!
Su cùmbidu lu prètzio de s’amigu,
però chi non mi nd’ ‘oghet simuleddu
o pirizolu, ca, raju!, una azigu
mi nd’at ruttu ‘e dentes e cherveddu
no est su meu cruu o pintuleddu!
E s’est beru chi s’unu at boza ‘e figu
de crabufigu si tattat a bortas,
cussas pro mene sun allegas... mortas!
Ca ue intrat Istene, ue lu pones,
nde carrat bonumore e simpatia;
issu ‘oltat in paghes sas chistiones,
sas làgrimas de dolu in allegria!
Ma oe non b’at Re, abberumia,
chi pagat che a prima sos buffones!
A narrer chi su dìcciu nât pretzisu:
coltza sa domo ue bi faltat risu!
Rie, adducas, rie... e t’ausenta
cun s’amigu chi tenes a costazu!
Fàgheli cara ‘ona, lu cuntenta,
gosa cun isse e non nde timas frazu!
A mie bastan saltitza e pulenta,
una corda ‘e crabittu e un’assazu
de casu giampagadu, una seada,
nepente e s’abbardente... ch’as cuada!»
SOS DÌCCIOS NON SUN... FAE