versione pdf - Sardegna DigitalLibrary

196
Pro amore ‘e sos promores si perdonat
Pro amore ‘e sos promores si perdonat...
-narat su dìcciu- e deo isto in s’istiga;
ma su chi tue as fattu non cunsonat
cun s’amistade nostra, ch’est antiga
inter chie rispettat sa fadiga
de su suore onestu, sa chi donat
sa paghe a cantos ch’ ‘ettan in sa terra
brios e coro, in eterna gherra!
Faghe ch’a babbu tou unu fulanu
ch’at istranzadu in sa pinnetta sua
e ch’at connottu cantu est dura e crua
sa vida ‘e su pastore, unu manzanu,
dispidéndesi, in pórrerli sa manu,
si che porterat un’anzone accua,
e nâmi si non pensas, a cunsonu,
mai sias cun nemos troppu ‘onu!
T’arvùrias tando, irroccas e minettas,
ti ‘enit boza de... ma no est gai!
Emmo, o amigu, cheret chi mi crêttas:
Su bonu fagher, no, non morit mai!
In su puttu ‘e s’isméntigu che l’ ‘ettas
mezus s’ ‘uccone malu ‘e s’arguai!
A chie at isbagliadu bi lu nara,
ma lu perdona, miréndelu in cara!
E deo in ojos pro’ a ti fissare
e ladinu ti naro:-Non crêia
chi mi poteras da’ ‘ucca leare
su chi pro un’annu tribuladu aia!
Ma l’as fattu! E mi pesat s’iscassia!
Bae, ses perdonadu. Ma gosare
chie no ischit it’est patimentu
non podet, mira! Ténelu in ammentu!
SOS DÌCCIOS NON SUN... FAE