versione pdf - Sardegna DigitalLibrary

22
Dolore ispinghet boghe
Dolore -nât su dìcciu- ispínghet boghe...
e si suspiro est ca suffro bastante,
a tales chi s’abbarro ancora inoghe
timo ‘e nd’ ‘essire ‘e su tottu mancante!
Lassadu solu, a su frie e coghe,
m’at sa ch’aia prus déchida amante,
fittiana in carignos, notte e die,
e s’est fuida... non isco cun chie!
In ite apo faltadu, prenda rara,
ojos de pinnadellu, ‘oghe ‘e ternura,
lughe de mill’isteddos pius giara,
bena manantiale de dultzura?
Si prus non m’as amore, mi lu nara,
pro chi m’avvie a sa sepoltura.
Ca morzo... emmo... si mi mancas tue!
Cun chie ses... faedda... nâmi inue!
Su prim’amore non s’olvìdat mai...
e tue fis, e ses, s’ùnicu ispantu.
Ma sun debadas pibios e prantu,
ca ses fuida cun s’amigu (est gai!)
chi tentu e gittu apo sempre a bantu!
E chie nd’ ‘essit da’ tant’arguai?
Mi’ chi perdo, pro summa disfortuna,
amigu e amante tott’in d’una!
E tue, Pilloncheddu ‘e chentu trassas,
chi giras che a bentu furriola,
duncas su mezus ranu, cando passas,
che frommija ti pijas da’ s’arzola
e-i sa reste a su massaju lassas
pro chi si campet! Assiat atzola!
Ma un’àteru dìcciu narat custu:
A pagare, si pagat a s’austu!
SOS DÌCCIOS NON SUN... FAE