versione pdf - Sardegna DigitalLibrary

224
SOS DÌCCIOS NON SUN... FAE
Chi bos gioghen che puddu a carrasciale!
Deris sero, coma’, in sa ‘e Ddedda
nâchi ijuccada bos l’azis a gosu
cussa limba ‘e... verzine anzonedda,
nênde a fulanu ch’est beccu e tinzosu,
a sa tale ch’est brùscia e pintuledda,
chi Babbai at s’amiga e ch’est zelosu
e ch’azis bidu, a manos in paneri,
ballende a mie cun su brigaderi!
Deus cherfat... già so a pane asciuttu
da-e cando fuidu m’est Toieddu!
Ma no est gai! Ancu su faeddu
bos manchet tott’in d’una, appenas ruttu
ch’est su sole, e bos bidedas suttu
che ou da’ sas terpes su cherveddu!
E in ojos, cant’azis bidu a mie,
duos sarrones, prim’ ‘e avrescher die!
Males apedas cantos ôs abbastan
pro segare de brunzu una campana
o cantos mossos de pane s’attastan
donzi die in su mundu a gana a gana.
Pro cantas untzas de farina impastan
un’arza, imbetzes, viuda o bajana,
bos pungat cada mermu ‘e sa persone,
ne balfan alga o ballu o cantone!
Canes de Fonne bos boghen sa matta
e su corvu bos fattat mesaluna;
de sas fizas non bos nde campet una,
maccos sos fizos, e tottu in suffratta
nettas e nebodes. E paris patta
cun custas... uras, ancu un’ateruna
bos nde ruat, pro non bos cherrer male:
chi bos gioghen che puddu a carrasciale!