versione pdf - Sardegna DigitalLibrary

128
Sa matessi ‘etzesa est maladia
Sa matessi ‘etzesa est maladia...
lu sustenen poetas e iscrittores
de onzi tempus, de cada nadia
e calcunu, pensende a sos dolores
de s’intrinu e timende sos ‘margores
de s’ ‘ider allizende a passu ‘e pia,
finas sa gràscia de no imbetzare
at chérfidu a s’Eternu dimandare.
E mancu male ch’ana puru iscrittu:
-Deus nos bardet da-e litteradu...
ca in su mundu un’ómine chittu
s’esserat gai non che fit bistadu!
Ma ch’est su caldu mezus de su frittu
b’at chie -mi dimando- che accabadu
diat poder sustènner persuasu?
O ch’est s’avrescher peus de s’occasu?
E s’istiu it’at prus de s’ijerru
o s’atunzu in mancu ‘e su ‘eranu?
Pro ‘enner pane, forsi a unu ranu
bettadu in su sulcu, de cuerru
bastat un’istajone? Malesanu
est chie si cherferat in s’interru
ca timet d’ ‘enner betzu e in suffratta!
Medas lu naran, ma... a ficca fatta!
E cale biadia est pius santa
che-i s’arvure ‘e s’ ‘ider rebuddende
e s’amorosa... cria tottacanta
de pesare, mancari tribulende,
finas a bènnere un’àtera pianta?
E nettas e nebodes... ciulende
no est gosu bastante pro affirmare
ch’est bellu e santu finas s’imbetzare?
SOS DÌCCIOS NON SUN... FAE