versione pdf - Sardegna DigitalLibrary

132
Sa bellesa non faghet domo
Bella ses bella, raju!... e sa bellesa
-lu naran tottu - est finas mesu doda,
faeddas bene... chi cheres intesa,
bestis che dama a s’ùltima moda!
Ammajados da’ tanta dechidesa
zòvanos meda ti faghen sa... roda
e cun s’ispera in cara pintada
chi lis intreghes nessi una mirada.
Donzi ‘olta però chi ti fentomo
un’ ‘uccone m’intendo in s’argoena
e intro ‘e coro, sùttile, una pena
ne su prîte cumprendo e ne l’inzomo.
Dêt esser ca ti naras Madalena
o proit’isco chi non faghet domo
sa bellesa, pro cantu siat rara
che-i sa tua, giovanedda cara!
Addaghi t’ ‘ido però milindrosa
tzocca e fue che su muscapia,
nusca e sue che una mariposa,
tando m’ammentas s’abe ‘e sa labia
ch’at Pisurzi cantadu in poesia,
chi pro esser liccarda e tirriosa,
surda a consizos bonos, presumida,
in sa saba lassadu ch’at sa vida!
Deo che Cuddu non pigo a sa trona,
ca chìriga non gitto e ne istola,
deo ti lu naro a s’intona-intona
che messaju chi connoschet s’arzola:
no istes che sa pula bola-’ola,
sias ranu... ch’est sa cosa prus bona,
su meressidu fruttu ‘e su suore,
su sale ‘iustu chi cundit s’amore.
SOS DÌCCIOS NON SUN... FAE