versione pdf - Sardegna DigitalLibrary

156
SOS DÌCCIOS NON SUN... FAE
Deus serrat una gianna e abberit unu balcone
Pesa... ca no est pasca donzi die
e tue ‘e pascas connottu nd’as chentu,
gràscias a Deus, attattu e cuntentu
finas a oe... o no est deasie?
Ca intro ‘e domo tenias a chie
t’assistiat in cada pensamentu,
ne aorradu s’at mai suores
pro bos bogare a mannos cun onores!
Como chi si ch’est mortu Luisicu
toccat a tie, ca ses su prus mannu,
a sa timona de ponner afficcu
de domo tua. Non t’ ‘enzat s’affannu
pro s’ingàrrigu nou! E sias riccu
che babbu tou ‘e fide e...da’ occannu
ti cunsidera che babbu e maridu
de sa famìlia inue ses naschìdu!
Non t’istes renta-renta... bae... faghe...
su passu longu incùrtziat su caminu!
Sias, comente ses, ómine ‘e tinu,
ordinza, sesta e tribàglia in paghe!
A frades tuos immanna in s’ambaghe,
a mama ammustra chi da-e su sinu
su latte chi l’as suttu s’est boltadu
in d’unu mare ‘e amore e cuidadu.
Iscas chi finas Deus una gianna
serrat a boltas -e-i sa rejone
nois piticos, ca est troppu manna,
non cumprendimos- ma unu balcone
ispampàrriat pro chie at devoscione!
E gai in domo ‘e Luisicu Sanna
est faghinde, comente in su connottu,
ca Isse isparghet su sole pro tottu.