versione pdf - Sardegna DigitalLibrary

134
A donzunu s’arte sua
Nâchi Badore est de coro ‘onu,
ch’a una musca non diat fagher male,
ca pro a isse teraccu e padronu
sun cabales... e mastru e maniale
su pretzisu...e galu agu e didale!
A cunfunder però lampu cun tronu
est neghe ‘e tzegos, ch’a nudda s’attonat,
ca s’unu ‘occhit, s’àteru attuntonat!
E como ch’a s’incantu l’at sa Corte
domos e benes postu e... finas s’ ‘attu,
acco’ proite abboghinat forte:
còmporat caru e bendet a barattu
chie cumpanza non tenet sa sorte!
E custu est beru... ma istat su fattu
chi non podet niune andare a catza
chena fusile e a sa macconatza!
Nât su dìcciu:-A donzunu s’arte sua!
e isse, ch’est trapperi non menguante,
s’est fattu tott’in d’una commerciante
de bottos de arringada e de atzua!
Creiat isse ‘e los tenner a lua
ca teniat un’ìscia, ue bundante
curret su riu e b’at finas ambidda
e galu a duos passos da’ sa ‘idda!
Cantu a s’isterzu... beh, cussu l’ischiat
chi de linna s’impittat o de canna
ca in sa buttega ‘e Tomas l’aiat
bidu unu die in s’oru ‘e sa gianna.
Su sale... già non fit ispesa manna
e da’ Casteddu -nâchi- nde ‘attiat
nessi una tumbarella! Ma bastadu
non l’est mancu pro a isse, disgrasciadu!
SOS DÌCCIOS NON SUN... FAE