versione pdf - Sardegna DigitalLibrary

146
Saccu bòidu non rezet reu
Tragachelu cuss’ou, ddeddu meu,
mi’ ch’abbarras a mannu ‘e petza nana!
Su cordiale non t’intrat in gana,
su pische abburris e finas, oddeu,
sos dulches... e nde rùspias sa banana!
Saccu bóidu, inte’, non rezet reu!
Ite drìngula est custa? Una majarza
ti dêt aer ojadu o puntu un’arza!
Tue ‘e Mastru Giuanne ses su fizu...
emmo ch’est gai! Che isse ses lanzu
e s’in domo ti nd’istas che istranzu
patente est che simmai s’assimizu!
Pro donzi mossu... assiat marturizu,
ne sas prommissas balen o calchi ‘anzu!
Che s’ ‘ideras su fele ‘e su Messia
sighis a tìrria sa perregottia!
S’iscumpasseras chentu, milli mares,
unu che a tie -naro- non l’agattas!
Tue pappas bentu e d’ ‘entu ti tattas,
un’iscarenu, Deus ‘ardet, pares!
Su male -mira- intrat a cantares
e a untzas ch’ ‘essit... adducas chi fattas
cheret a fizu ‘onu e ch’ ‘ettas franca
a su chi mama ti ponet in banca.
Matta non nde pienan sas paràulas...
già l’isco, ma su meu est suddu mannu.
O sas chi ti so nênde sunu fàulas?
D’isganadittos ch’an àpidu dannu
s’ischeras cantos nde connosco in tàulas
furriados de lettu e in affannu!
Torra a sa tanca che Murru... e t’appretta,
ca non sun rajos pische, casu e petta!
SOS DÌCCIOS NON SUN... FAE