versione pdf - Sardegna DigitalLibrary

24
A su bisonzu connosches s’amigu
Chie at pane, a boltas, no at dentes
e a chie at dentes faltat pane.
Benin sas dentes primm’ ‘e sos parentes,
s’ ‘ettat un’ossu finas a su cane!
E tue, Paulicu-mariane,
ch’attraessas sos chimbe continentes,
a risu in laras, a su nusca-nusca,
mancu m’as dadu unu piattu ‘e... musca!
A su bisonzu connosches s’amigu...
emmo ch’est gai... como l’isco e tottu!
T’aera a lùscias pretesu orzu e trigu
o infurradas medas de biscottu!
De m’imprestare pr’una notte azigu
un’acchetta cheria da’ su fiottu
chi tenes a s’iscappu in sas cussorzas
de Ichnusa e de bonas corzas!
Timias forsis mi l’êra mantesa
o de ti la torrare che maltratta?
Non siat mai! Ti l’aia ‘tatta
d’aligarza ‘e prima, sennaresa,
che cugùmene russa, e pane ‘e fresa,
fin’a benner a dólimas de matta!
E posca ‘e tres o battor buschistrìglias
torrada cun fiocchittos e ischìglias!
Ma tue a cuss’orija non b’intendes
s’est chi non miras bisonzu e attogu
e a s’amigu a deunzu li rendes
a mischintzia àteru... piogu!
Forsi su dìcciu chi nât non cumprendes
ch’a niune si negat abba e fogu?
O pensende lu faghes, a iscaddu,
ch’a paza sola ammasettat caddu?
SOS DÌCCIOS NON SUN... FAE