versione pdf - Sardegna DigitalLibrary

60
Sa luna ‘e cabidanni lughet de piusu
Notte silena...isteddada...d’istiu...
notte majarza de grìglios e ranas,
notte ‘e suspiros d’abbertas ventanas
chi si che portat pàsidu su riu,
nott’ ‘e luna, de mùsicas arcanas
chi dan a su poeta frua e briu
pro isterrer sa ‘oghe in rimas d’oro
a sos toccheddos infattu ‘e su coro.
Luna ‘e cabidanni, e prîte mai
-comente naran- lughes de piusu?
Forsi in s’andera tua, da-e susu,
mezus li legges s’ìntimu arguai
a’ custu poeteddu? E s’est gai,
e ca t’appenas in l’ ‘ider delusu,
cun cant’as pôre lughes pius forte
pro chi ch’istorret su pensu ‘e sa Morte?
Cantas arrejonadas, si l’ischeras,
nos faghimos cun Issa, Luna ‘e prata,
a notte e die, cando sa suffratta
ti ‘errinat sas dìligas isperas!
E cando, cun su coro a una catta,
t’abbizas chi sas bramas sun chimeras...
ch’est unu bugnu bóidu sa vida
e t’ ‘enit boza ‘e pasu...’e recuida!
Ca cun sa Morte -nân- s’agabbat tottu
e torrat s’ómine a bidea pura,
a su mundu ue non b’at connottu,
ne deris oe o cras...a sa Natura!
Ma su brincu...su brincu... che a fura
damilu tue nottesta un’accottu,
Luna ‘e cabidanni, Lughe giara...
pustis mi pianghe...o rìemi in cara!
SOS DÌCCIOS NON SUN... FAE