versione pdf - Sardegna DigitalLibrary

92
Su sale est bonu cand’est pagu
Lassa sos bantos... ca sos burtzighinos
non ti los dês lustrare tue e tottu.
Faghiat gai su coltzu ‘e Malutrottu
su curridore de caddos runzinos
chi ch’aimis in bidda e chi connottu
fit finas in sos trighinzos bighinos
non pro sos pannos chi si ‘alanzaiat,
ma pro sas ancas fàlchinas ch’ aiat!
Lea unu chìsciu tue e... l’immesa:
onzi perra un’anca paris patta!
Aggiunghibei chi fit chena matta,
bratzicurtzu, sa conca che suspesa:
unu bócciulu... o un’ou a catta!
Però sa limba cheriat intesa:
issu aiat bissu pannos e medàglias
in chentu galas, in milli battàglias!
Leat primu chie curret de piusu...
e sa sentèntzia no est cosa noa!
Isse curriat che su ‘entu ‘e Susu
ma, s’arriviat, che fit sempre in coa!
Una nd’aeret bìnchidu de proa...
chi nos l’aimis balladu che fusu
e finas postu in d’unu molimentu
pro chi eternu durerat s’ammentu!
Sos chi s’ ‘antan, però, male si sentin...
puden a boltas e lassan fiagu,
sun faularzos e lestros s’ismentin
ca sun che casu fattu chena giagu,
los iscòbias ma non si che penentin!
Su sale -crê’- est bonu cand’est pagu,
ma si l’aggiunghes a chie est istrambu
non nd’ ‘essit su matessi da-e bambu!
SOS DÌCCIOS NON SUN... FAE