versione pdf - Sardegna DigitalLibrary

120
Da-e sa pedra non bessit ozu
Da-e sas pedras non nde ‘ogas d’ozu
ne tue e ne niune, ca mattana
est chena gosu, un’ispera vana,
unu ‘ettare trigu e còglier lozu!
Torra a sa terra... e si, a gana a gana,
che prima la trabàglias, calchi appozu
finas da’ Deus non t’at a mancare,
ca santa est sa terra che’ s’altare!
Pàstina ‘inza e màndigas fruttu...
-ammonestat una sentèntzia antiga-
Betta laore e carignas ispiga...
-nât un’àteru dìcciu sempre acutu-
E Deus beneighet sa fadiga
de cantos su suore, a coro alluttu,
ispràmminan per terra e los cumpensat
cantu s’ómine a boltas mancu pensat.
Chie at tanca, at banca in custa vida...
e tue nd’as calcuna, non lu neghes!
Ma s’aggradessis sa mesa frunida
cheret ch’ares, ch’ispédrighes, chi seghes
malesa e tuppas e chi t’assusseghes
in su trabàgliu fintzas ch’est cumprida
donzi faina e b’avreschet ranu
bellu che sole in die de ‘eranu!
Niune ‘ogat montes da-e fundu
ma sa patata si non nde la ‘ogas
non crêo chi nde seghes o nde cogas!
E donzi vìsciu malu de su mundu
cun su trabàgliu in mare ch’attogas
e in su t’ ‘ider sos tuos in tundu
cuntentos, as a narrer a iscancàgliu:
-Chi siat beneittu su trabàgliu!-
SOS DÌCCIOS NON SUN... FAE