versione pdf - Sardegna DigitalLibrary

192
Sa rejone a chie l’at...-narat Babbaima
su primmu est isse a la pretender
in cada arréjonu e lestru a s’offender
si ti nât “goi” e tue li nâs “gai”!
Isse est che Gesu, chi non faddit mai,
ischit tottu e resessit a cumprender
de custa vida nostra donz’arcanu,
ca est preide, santu e antzianu.
Sa rejone a chie l’at
«Nerzat, Babba’: a chie at fattu innante
su Mere Mannu, a sa pudda o a s’ou?»
-Sa ticca, conca ‘e càule, ignorante,
c’a parte ‘e Susu lis piaghet su brou!-
«Onzi male faghet su cursu sou
o est pro su meràculu bastante
calchi Glòria o Ave?» -Tostorrudu,
a Deu e a duttores pedi aggiudu!-
«E perdonare la diat Vostè
si l’abbojerat calchi Madalena?»
-Mai!... antzis emmo... e pro un’acchè:
s’est zente tua cussa conchilena!-
«E si lu lêren a falas de pe’
o a istutturradas, cale pena
a sos malattrividos diat dare?
O che frades los diat abbratzare?»
-Nât s’Evanzéliu chi s’àtera barra
dêt porrer su cristianu rie-rie.
E deo ap’a fagher deasie
...appoi ‘e l’aer dadu sa cabarra!-
«Nerzat infinis s’est beru o s’est ciarra
chi su... corvu arroghidu carrat nie.»
-Signalat abba... emmo... conca ‘e mulu,
pro chi t’innètties cara, limba e... culu!-
SOS DÌCCIOS NON SUN... FAE