versione pdf - Sardegna DigitalLibrary

108
Iscuru a chie at mala lumenada
“Non b’at d’istare a s’intzerta-intzerta
pro narrer chi est fiza ‘e Tomas Piga!
Duos lùttios d’abba! Sa mirada amiga,
sos ojos sempr’abbistos, a sa lerta,
chiza, petza e andanta! «Mater certa,
pater nunquam!», su dìcciu ‘e Roma antiga
préigat malisciosu, pr’ammentare
chi de sos babbos podimos... dudare!
Ma non pigat a trona custa ‘ia
Roma sa manna, própriu gai, crê’
e, si mi faddo, ammitto, abberumia,
chi finas deo so fizu ‘e su... Re!
Fattu già nde l’at a caddu e a pê’
sa coltza ‘e sa muzere, già l’ischia,
ma si ‘e Tomas cussa no est fiza
est a sa fae a li narrer lentiza!”
“E tucca a Roma a ti nde penentire,
addaghi su cherveddu gighes leccu!
In bucca, su ch’as nadu, dês ischire
che ramagliette in coa de beccu
ti deghet! E ses tzertu ‘e non faddire!
Ma non ses fizu ‘e Re... giaghi su peccu
non fis cussu ch’aiat mama tua,
ma d’aer fedadu una conca... crua!
Iscuru a chie at mala lumenada...
e non fit santa ‘e nìcciu sa pobidda
si, a nd’intender, l’at iscurrizada
a narrer pagu su mesu ‘e sa ‘idda!
Cun sos connados finas s’est furriada,
bellos che sole, e calchi ischintidda
che a tie in sa fiza l’ ‘iden tottu!
E nos torrat su dìcciu a su... connottu!”
SOS DÌCCIOS NON SUN... FAE