versione pdf - Sardegna DigitalLibrary

160
Chie non faghet male, male non pensat
Non bi prettedas mai, fizos mios,
cun chie bos fatterat calchi tortu,
ca su “chertu” est che s’abba ‘e chentu rios
chi lompet a sa foghe chen’importu!
Sos avvocados ispozan sos bios
e su preìderu ispozat su mortu...
-narat su dìcciu- Ed est própriu gai:
in chistionos non s’ alanzat mai!
S’arma de impittare est su perdonu
e pius balet s’est grae su dannu!
Chie perdonat tenet coro mannu
e selena est sa mente ‘e chie est bonu.
Pensade a Gesus: fit mere e padronu
e fattu s’est teraccu... e in s’affannu
de sa Rughe a su Babbu at dimandadu
perdonu pro chie l’at ingiaittadu!
Mai bos intret boza de vinditta,
massim’a tottu cando paret giusta!
Berrina non bi nd’at peus de custa
chi t’ ‘ óltulat sa conca, malaitta,
o ti si cravet in corpus che rusta!
Su sàbiu faghet cosa beneitta
cando, finas potende, ‘e seberare
pensat de non si cherrer vindicare!
Chie male non faghet, non nde pensat...
e, si nde retzit, s’istringhet in palas
mirat a Deu e sas bideas malas,
si nde l’ ‘enzeran, luego las sensat!
E Su ‘e Susu a’ custos los cumpensat
déndelis, che a sas aes, fortes alas
pro si pesare a bolu ‘ittoriosos
subr’a sos frades pius tirriosos.
SOS DÌCCIOS NON SUN... FAE