As “Maletas” - Asociación Cultural de Estudios Históricos de Galicia

Actividade sindical
Tres voces proletarias coruñesas
Tal como acabamos de indicar, Taboada veuse obrigado a cambiar de oficio para
poder subsistir. En todas as sociedades obreiras das que formou parte, e foron todas as
relacionadas cos seus oficios, destacou pola súa actividade, o que lle valeu cárcere polo
menos en dúas ocasións: en 1901, con motivo dos sucesos do motín de consumos (de xuño
a setembro), e en 1917 (de agosto a novembro) polos sucesos da folga revolucionaria 92 .
Entre os datos localizados sobre a súa actividade profesional, destacamos os seguintes:
Augador
Foi os seu primeiro oficio e foi o primeiro presidente da sociedade de resistencia dos
augadores e augadoras La Libertad, polo que podemos supoñer que tería un papel
decisivo na súa constitución e nos primeiros actos da nova sociedade 93 . No contexto das
consecuencias dos sucesos de maio de 1901, foi detido pola autoridade militar como
presidente de sociedade dos augadores 94 , permanecendo no cárcere desde o 25 de xuño
ata o 12 de setembro 95 . Tras estes sucesos, Taboada figura na prensa aínda como augador
durante uns meses, pero desde decembro de 1901 deixara a presidencia da sociedade de
resistencia.
En 1901 foi tamén detida a súa muller, Dolores Sánchez, que substituía a Taboada nas
faenas de augador do cárcere 96 , polo que podemos imaxinar a súa angustia e preocupación
polo desamparo en que quedaban seus fillos.
A finais de xaneiro de 1902 o alcalde, Fernández López, comunica a Taboada seu cese
como augador do cárcere, alegando que xa existía condución de auga ao lugar. Como
para poder atender ese traballo Taboada tivera que deixar de atender outras casas ás
que servía de auga, quedaba sen o seu medio de subsistencia, polo que solicitou por
escrito ao Concello que se procurase empregalo nalgunha das obras de construción, ao
que o alcalde respondeu que non daría traballo a quen organizaba mitins e asinara as
conclusións do mitin da Praza de Touros no que se denunciaba con dureza os atropelos
dos gardas de Consumos 97 . A situación de Taboada era desesperada, pois tamén era
rexeitado noutros traballos pola súa actividade sindical 98 .
92 Ao parecer, sorteara “juguetes mecánicos” -armas- entre os traballadores para preparalos para a folga revolucionaria
de 1917, o que lIe valeu prisión e consello de guerra (SO, 8-7-1933). Foi liberado o 21 de novembro
(EN, 22-11-1917).
93 LVG, 4-2-1901; 4-3-1901; 3-4-1901.
94 LVG, 26-6-1901.
95 LVG, 13-9-1901.
96 Se verificó su detención [Dolores Sánchez] cuando llegó muy de mañana a este establecimiento conduciendo
una cuba de agua (LVG, 30-6-1901).
97 EN, 13-1-1902.
98 Texto da carta que envía á prensa en EC, 2-3-1902 que se transcribe máis adiante.
NALGURES · TOMO VI · AÑO 2010 257