Europako Erreferentzia Markoa - HABE

1 8 6
7.3.2 Atazen baldintza eta mugak
Ikasgelako atazen baldintza eta mugekin loturiko hainbat eragile manipulatu egin daitezke, bi atazamodu
hauetatik zein eratakoa den kontuan hartuta:
• Elkarreraginezko eta ekoizpenezko ataza
• Harrera-ataza
7.3.2.1 Elkarreraginezko eta ekoizpen-atazen baldintza eta mugak
Honako baldintza eta muga hauek eragiten diote elkarreraginezko eta ekoizpen-atazen zailtasunari:
• laguntza
• denbora
• helburua
• aurreikuspena
• baldintza fisikoak
• parte-hartzaileak.
Kanpoko laguntza
Testuinguruari buruzko hainbat elementuren gaineko informazio egokia emateak eta laguntza linguistiko
nahikoa emateak erraztu egin dezake ataza.
• Testuinguruari buruzko informazioa: ataza egitea errazagoa izan daiteke informazio nahikoa
eta egokia ematen bada –parte-hartzaileei buruz, bete behar diren zereginei buruz, edukiari
buruz, helburuei buruz, inguruneari buruz (ikusizko laguntza barne)–, eta ataza gauzatzeko
jarraibide edo orientazio garbiak, egokiak eta nahikoak eskaintzen badira.
• Informazio linguistikoa: ataza saiatzea edo aurretiko prestakuntza-fase batean ataza paralelo
bat egitea, eta laguntza linguistikoa jasotzea (hitz-gakoak, etab.) oso lagungarria da elkarreraginezko
jardueretan, itxaropenak sortzeko, aurretiko esperientziak gogora ekartzeko eta aurretiko
ezagutzak eta ikasitako eskemak aktibatzeko. Ekoizpen-atazen aurreko jarduerak errazago egingo
dira, jakina, baldin eta ataza egin behar duenak kontsulta-lanak, eredu egokiak eta beste pertsona
batzuen laguntza badu.
Denbora
Litekeena da, ataza prestatzeko eta gauzatzeko zenbat eta denbora gutxiago izan, orduan eta zailagoa
gertatzea. Ildo horretatik, hainbat alderdi kontuan hartzea komeni da:
• Ataza prestatzeko denbora: hots, zenbateraino planifika eta saia daitekeen ataza: bat-bateko
komunikazioan, ezinezkoa da berariazko planifikaziorik egitea, eta, beraz, ataza arrakastaz gauzatzeko,
hainbat estrategia erabili beharko dira era inkontzientean; beste egoera batzuetan, ikasleak
askatasun handiagoa izango du eta era kontzienteagoan erabili ahal izango ditu estrategia
egokiak. Adibidez, komunikazio-eskemak gutxi asko aurreikusgarriak direnean –truke arruntean
esaterako–, edo testua planifikatzeko, gauzatzeko, ebaluatzeko eta aurkezteko denbora aski duenean,
berehalako erantzunik eskatzen ez duten elkarreraginezko jardueretan (gutun-trukean, besteak
beste) edo berehalakoak ez diren idatzizko edo ahozko ekoizpen-jardueretan.
• Ataza gauzatzeko denbora: komunikazioa zenbat eta bat-batekoagoa izan, hau da, ataza egiteko
zenbat eta denbora gutxiago izan, orduan eta presio handiagoa izango du ikasleak hura gauzatzerakoan.
Nolanahi ere, elkarreraginezko edo ekoizpen-jarduerek, bat-batekoak ez izan arren
ere, sortzen dute presio hori, adibidez denbora-tarte jakin batean testu bat osatu behar denean;
izan ere, horrelakoetan, lana planifikatzeko, gauzatzeko, ebaluatzeko eta zuzentzeko denbora
gutxiago izango da.