Europako Erreferentzia Markoa - HABE

ez jabetzen laguntzea, gaitasun horiek hobetzeko eta arlo jakinetan eraginkortasunez erabiltzeko.
1 9 7
8.4.2 Portfolioa eta profila
Ikusten da, beraz, ezagutzen eta trebetasunen aitortzak eta ebaluazioak kontuan hartu beharko lituzkeela
gaitasun eta trebetasun horiek garatzeko aukera ematen duten egoerak eta esperientziak.
Hizkuntzen Europako Portfolioak aukera ematen dio gizabanakoari bere hizkuntz biografiako hainbat
alderdi erregistratzeko eta aurkezteko, eta, alde horretatik, aurrerabidea ematen du. Hizkuntza jakin
baten ikaskuntzan lortutako edozein ezagutza ofizial barne hartzeko moduan dago diseinatuta, eta baita
beste hizkuntza eta kultura batzuekiko harremanari dagozkion esperientzia informalagoen erregistroa
egiteko moduan ere.
Hala ere, Bigarren Hezkuntzaren amaieran hizkuntzaren ikaskuntzaren ebaluazioa egiten denean
eskolako kurrikuluaren eta kanpoko kurrikuluaren arteko lotura nabarmentzeko, komeni da gaitasun
eleanitz eta kulturanitzari berari ezagutza ofizialen bat ematen saiatzea, agian hainbat konbinazio onar
ditzakeen irteerako profil baten berri emateko, eta ez soilik hizkuntza jakin bati edo batzuei buruz,
kasuaren arabera, aldez aurretik finkatutako maila bakarra erabiliz.
Gaitasun partzialen ezagutza “ofiziala” aurrerapausoa izan daiteke norabide horretan (eta ona litzateke
nazioarteko titulu-sistema nagusiak horretan aitzindari izatea, zein bere aldetik ezagutuz, adibidez,
ulermenezko eta adierazpenezko idatzizko eta ahozko lau trebetasunak, nahitaez guztiak batera
bildu beharrean). Baina ona litzateke, halaber, hainbat hizkuntza eta kulturetan ongi moldatzeko gaitasuna
kontuan hartzea eta era formalean ezagutzea. Atzerriko bigarren hizkuntzatik atzerriko lehen hizkuntzara
itzultzea (edo laburtzea), hainbat hizkuntzak parte hartzen duten ahozko eztabaida batean
parte hartzea, gertaera kultural bat beste kultura baten ikuspegitik interpretatzea… bitartekotzako adibideak
dira (txosten honek dioenari jarraituz), errepertorio eleanitz eta kulturanitz bati etekina ateratzeko
gaitasuna ezagutzeko eta balioesteko kontuan hartu beharrekoak.
8.4.3 Ikuspegi alderdianitza eta modularra
Kapitulu honek arreta eman nahi dio, oro har, kurrikuluaren diseinuaren ikuspegi aldaketari edo,
gutxienez, konplexutasun gero eta handiagoari eta horrek ebaluazioan eta egiaztagirien banaketan duen
eraginari. Garrantzi handikoa da etapak edukiaren eta garapenaren arabera bereiztea. Horretarako, osagai
nagusi bat har daiteke (osagai linguistikoa edo nozional eta funtzionala, adibidez), edo hizkuntza
bati buruzko alderdi guztiak landu. Garrantzizkoa da, halaber, kurrikulu alderdianitz baten osagaiak
garbi bereiztea (oso kontuan hartuta Erreferentzia Markoaren alderdiak) eta ebaluazio-metodoak ere
bereiztea, ikaskuntza modularra eta egiaztagiri-sistema batzuk sustatzeko. Horrek aukera emango
luke, era sinkronikoan (hau da, ikaskuntza-ibilbideko une jakin batean) edo diakronikoan (hots, ibilbide
horretako hainbat etapatan barrena), gaitasun eleanitz eta kulturanitzak garatzeko eta ezagutzeko,
“geometria aldakorra” erabiliz (hots, gizabanako batetik bestera aldatzen diren eta denboran zehar
gizabanako beraren baitan aldatzen diren egitura eta osagaiak dituen geometria erabiliz).
Ikasleak eskolan egiten duen ibilbideko zenbait unetan, aurretik zehatz azaldutako eskolako kurrikuluari
eta agertokiei jarraituz, hainbat hizkuntza inplikatzen dituzten kurrikuluarteko modulu labur
batzuk erabil daitezke. “Hizkuntzaz haragoko” modulu horien baitan ikaskuntzari buruzko ikuspegi eta
baliabide asko, ikastetxearen kanpoko ingurunea erabiltzeko eta kulturarteko harremanetako gaizki-