Europako Erreferentzia Markoa - HABE

D eranskina
ALTEren zehaztapenak
2 6 7
Eranskin honetan ALTEren “Gai da” zehaztapenak deskribatzen dira. Zehaztapen horiek Association
of Language Testers in Europa (ALTE) elkartea epe luzera begira egiten ari den ikerketa-proiektu
baten osagai dira. “Gai da” motako zehaztapenen helburuak eta zer-nolakoak aurkeztuko dira atal
honetan. Ondoren, zehaztapen horiek nola garatu diren aztertuko dugu, ALTEko azterketekin loturik
eta Erreferentzia Markoarekiko esparruan. Proiektu horren deskribatzaileak mailakatu eta Markoaren
mailekin parekatu ziren, A eranskinean azaldutako 12.c metodoari jarraituz (Raschen metodoa).
1. ALTEren markoa eta “Gai da” proiektua
ALTEren markoa
ALTEren “Gai da” proiektuaren zehaztapenak epe luzera begira ezarritako ikerketa-programa baten
funtsezko osagai dira. Programa horren helburua da azterketak objektibotasunez deskribatzeko hizkuntz
jardueraren maila-giltzarri batzuk sortzea.
Ikerketaren zati handi bat eginda dago, ALTEren partaideen azterketa-sistemak marko horren
barruan jartzea hain zuzen ere, azterketen edukiaren, ataza-moten eta ikasle-gaien profilen analisian
oinarrituta. Azterketa-sistema horren sarrera osoa edonoren eskura dago liburu honetan: Handbook of
European Language Examinations and Examination Systems (ALTE) (ikus 27. eta 167. orrialdeak).
ALTEren “Gai da” eskalak erabiltzailean oinarrituak dira
“Gai da” proiektuaren helburua da, ikasleak atzerriko hizkuntzari buruz zer egiteko gai diren deskribatzeko,
hizkuntz jarduerarekin lotutako eskala multzo bat eratzea eta balioztatzea.
Aldersonen deskribapenaren arabera (1991), egile, aztertzaile eta erabiltzaileari begirako eskalen
artean, ALTEren “Gai da” zehaztapenak erabiltzailean oinarrituak dira, jatorriz. Ebaluazio-prozesuan
parte hartzen duten pertsonen edo erakundeen arteko komunikazioa errazten dute, eta bereziki
lagungarri dira azterketen emaitzak, aditu izan gabe, interpretatzen dihardutenentzat. Zehaztapen
horiek honako hau eskaintzen dute:
a) Hizkuntzen irakaskuntzan eta ebaluazioan parte hartzen duen ororentzako tresna baliagarri
bat. Hizkuntzaren erabiltzaileek egiten dakitenaren zerrenda gisa erabil daiteke; horrela erabilita,
erabiltzaileak zein urratsetan dauden zehazteko aukera ematen du.
b) Diagnosirako probak, jardueretan oinarritutako kurrikuluak eta irakaskuntzarako materialak
garatzeko abiapuntu bat.
c) Jardueretan oinarritutako hizkuntz kontrola egiteko baliabide bat, hizkuntzen arloko formazioan
interesa dutenentzat eta enpresetan langileak hautatzeko ardura dutenentzat baliagarria.
d) Hainbat hizkuntzatan baina testuinguru berean erabiltzen diren ikastaroen eta materialen helburuak
alderatzeko bitartekoa.
Onuragarri izango dira hezkuntzan eta pertsonal-sailetan ari direnentzat, jardueraren deskribapen