Europako Erreferentzia Markoa - HABE

1 9 6
• Gaitasun “partzialak” txertatzen direlako tartean, lehen aipatu den moduan.
Ohar labur horiei erants dakieke tarte bat utzi beharra dagoela kasu orotan ikasleak derrigorrez edo
nahita betetzen dituen ikaskuntza-ibilbideen eta ikuspegien analisia egiteko, analisi hori edozein unetan
eta hizkuntza guztietarako egiteko tartea. Horrek esan nahi du garbi utzi behar dela ikastetxearen
kurrikuluaren diseinuan “ikaskuntzaren kontzientzia” pixkanaka garatu eta hizkuntz hezkuntza orokorrean
txertatuko dela. Izan ere, bere gaitasunen eta estrategien gaineko kontrol metakognitiboa izaten
lagunduko dio horrek ikasleari. Ikasleek estrategia eta gaitasun horiek beste gaitasun eta estrategia
posible batzuekin lotuko dituzte, arlo jakin bati loturiko atazak gauzatu behar dituztenean egiten dituzten
hizkuntz jarduerekin.
Beste era batera esanda, kurrikuluaren diseinuaren helburuetako bat, edozein kurrikuluren helburuetako
bat, ikaslea kategoriez eta kategorien arteko elkarreragin dinamikoaz jabetzea da, Erreferentzia
Markoan proposatzen den ereduari jarraituz.
8.4 Ebaluazioa eta ikaskuntza, eskolan, eskolatik kanpo, eta eskola garaiaz gero
Kurrikulua ikasleak bere hezkuntza-esperientzietan erakunde baten kontrolpean edo bestela egindako
ibilbidearen arabera definitzen bada, eta horixe iradokitzen du haren esanahi nagusiak, orduan, kurrikulua
ez da amaitzen eskolako ikasketak amaitzen direnean; aitzitik, jarraitu egiten du hortik aurrera
ere, nolabait ere, bizi guztian iraungo duen ikaskuntza-prozesu batean zehar.
Ikuspegi horretatik, beraz, ikastetxe batek, erakunde den aldetik, prestatutako kurrikuluaren xedea
izango da ikasleak eskolako ikasketen amaieran gaitasun eleanitza eta kulturanitza eskuratzea, hau da,
gizabanakoaren eta norberak ibilitako bidearen arabera hainbat profil izan ditzakeen gaitasun bat eskuratzea.
Bistakoa da gaitasun hori ez dela aldaezina eta haren garapena eta oreka aldatu egingo direla
gizarte-eragile bakoitzaren esperientzia pertsonalen eta profesionalen arabera eta bizitzaren norabidearen
arabera, garapenaren, murrizketaren eta eraldaketaren bidez. Horretan zeresana du helduen hezkuntzak
eta formazio jarraituak, besteak beste. Ildo horretatik, hiru alderdi osagarri hartu behar dira
kontuan.
8.4.1 Eskolako kurrikuluaren zeregina
Onartzen bada hezkuntza-kurrikuluak ez duela ikastetxera mugatu behar eta ez dela eskolako ikasketekin
batera bukatzen, era berean onartuko da gaitasun eleanitza eta kulturanitza eskolan hasi aurretik
jar daitekeela abian, eta, era berean, eskolako ikasketekin batera, paraleloan, ikastetxetik kanpo jarrai
daitekeela garatzen. Familia barneko ikaskuntzaren eta esperientziaren bidez, historiaren bidez, belaunaldien
arteko harremanen bidez, bidaien bidez, atzerriratzearen bidez, emigrazioaren bidez, eta, orokorrago,
ingurune eleanitzean eta kulturanitzean jardunez, gerta daiteke hori, edo batetik bestera aldatuz,
baina baita irakurketaren eta komunikabideen laguntzarekin ere.
Hori guztia bistakoa den arren, bistakoa da, halaber, ikastetxeak ez duela beti hori guztia kontuan
izaten. Beraz, eskolako kurrikulua kurrikulu askoz ere zabalago baten parte dela pentsatzea komeni da,
nahiz eta honako funtzio hauek ere bete behar dituen:
• Ikasleei hasierako errepertorio eleanitz eta kulturanitz zabala eta bereizia eskaintzea (aurretik
aurkeztu diren bi agertokietan iradokitako ibilbide posible batzuekin).
• Ikasleei eskolan nahiz eskolatik kanpo eskura dituzten gaitasunez, ahalmenez eta baliabide-