Europako Erreferentzia Markoa - HABE

2 0 7
Erreferentzia Markoak menderatzearen edo lerro jarraituaren ikuspegiak har ditzake.
• Lerro jarraituaren ikuspegian erabiltzen den maila-eskala Erreferentzi maila batera -
tuekin pareka daiteke.
• Menderatze ikuspegian lortu beharreko helburua Erreferentzia Markoak eskaintzen
dituen kategorien eta mailen koadro kontzeptualean deskriba daiteke.
9.3.4 Ebaluazio jarraitua/Une jakin bateko ebaluazioa
Ebaluazio jarraitua irakasleak, eta baita, agian, ikasleak ere, gelako jarduerei, ikastaroko lanei eta
proiektuei buruz egiten duen ebaluazioa da. Azken emaitzak, beraz, ikastaro, ikasturte edo seihileko
osoa hartzen du kontuan.
Une jakin bateko ebaluazioa egun batean, oro har ikastaroaren amaieran edo ikastaroa hasi aurretik,
egiten den azterketa bat edo beste era bateko proba bat oinarri hartuta nota jartzea eta erabakiak
hartzea da. Aurretik gertatu dena, ordea, alde batera uzten da; garrantzizkoa pertsonak orain, une honetan,
zer egiten dakien neurtzea da.
Oro har, ebaluazioa ikastaroaz kanpoko zerbait dela jotzen da, une jakin batzuetan eta erabaki
batzuk hartzeko egiten den zerbait. Ebaluazio jarraitua ikastaroan txertatuta dago, eta ikastaroaren
amaierako ebaluazioari laguntzen dio, metaketaren bidez. Etxeko lanak eta aprobetxamenduko proba
laburrak (tarteka nahiz sarri egiten direnak) kalifikatzeaz gainera, ebaluazio jarraitua honela ere egin
daiteke: irakasleek edo ikasleek kontrol-zerrenda edo “zerrendak” betez, ataza espezifiko batzuen ebaluazioa
eginez, testuliburua edo gidaliburua oinarri hartuta ebaluazio formala eginez, eta laneko laginen
karpeta bat betez, ikastaroaren hainbat unetan eta karpeta horren lanketaren hainbat fasetan.
Ikuspegi horiek badituzte abantaila batzuk eta eragozpen batzuk.
Une jakin bateko ebaluazioak pertsonak agian aurreko urteetan ikasiak dituen gauzak oraindik egiten
badakizkiela bermatzen du. Hala ere, traumak sor ditzake azterketaren ondorioz, eta mota jakin
bateko ikasleentzako mesedegarri da.
Ebaluazio jarraituak, aldiz, aukera ematen du sormena eta norberaren ezaugarriak kontuan hartzeko,
baina irakasleak objektibo izateko duen ahalmenaren mende dago. Muturrera eramanda, bizitza
bera proba amaigabe bihur daiteke ikaslearentzat eta amesgaizto burokratiko galanta irakaslearentzat.
Ahalmena komunikazio-jarduerei lotuta deskribatzen duten irizpideen zehaztapenen zerrendak (4.
kapitulua) baliagarri izan daitezke ebaluazio jarraituan. Bestalde, gaitasunaren alderdien deskribatzaileetatik
abiatuta eraturiko neurketa-eskalak (5. kapitulua) une jakin batean egindako ebaluazioan notak
emateko erabil daitezke.
9.3.5 Ebaluazio formatiboa/Ebaluazio sumatiboa
Ebaluazio formatiboa ikaskuntzaren nondik norakoari buruzko informazio-bilketa etengabea da,
puntu ahulak eta sendoak aurkitzeko aukera ematen duen prozesu jarraitu bat. Irakasleak ikastaroa planifikatzeko
eta ikasleentzako atzeraelikadura eraginkorra bideratzeko erabil dezake. Ebaluazio formatiboa
zentzurik zabalenean erabiltzen da sarri, galdetegi eta kontsultetatik lortutako informazio kuantifikaezina
bere baitan har dezan.