Europako Erreferentzia Markoa - HABE

3 8
Nolanahi ere, argitu behar dugu, berriro ere, Erreferentzia Markoak hizkuntzaren bereganatze, ikaskuntza
eta irakaskuntzari buruz duen zeregina. Demokrazia pluralistaren oinarrizko printzipioei jarraituz,
Markoaren asmoa ez da integratzailea, gardena eta koherentea izatea huts-hutsik; irekia, dinamikoa
eta ez dogmatikoa ere izan nahi du. Horregatik, ez du inoren alde egingo gaur egungo hizkuntza
bereganatzeko prozesuaren izaerari eta prozesu horrek hizkuntzen ikaskuntzarekin duen loturari buruzko
eztabaida teorikoetan, eta ez da hartu behar hizkuntzen irakaskuntzaren ikuspegi jakin bati atxikitako
lantzat ere, ez baitu ikuspegi jakin bat hobesten besteak alde batera utzita.
Hizkuntzen ikaskuntzan eta irakaskuntzan diharduten pertsona oro beren oinarri teorikoak eta prozedura
praktikoak ahalik eta argien eta gardenen azaltzera bultzatzea da lan honen eginkizuna.
Eginkizun hori betetzeko xedeaz, Erreferentzia Markoak kategoriak, parametroak, irizpideak eta
mailaketak proposatzen dizkie erabiltzaileei, eta litekeena da, tresna horiei esker, erabiltzaileek uste
zuten baino aukera-sail zabalagoa kontuan hartzea, edo planteamendu tradizionalak, berrikusi gabe
zeudenak eta oraindik lanean erabiltzen direnak, zalantzan jartzea. Horrek ez du esan nahi jarrera
horiek okerrak direnik; esan nahi duena da komeni dela planifikazioa egiteko ardura dutenek berriro
ere teoria eta praktika ikuskatzea, beste profesional batzuek beren kabuz, eta, batez ere, Europako beste
herrialde batzuetan, hartu dituzten erabakiak kontuan hartzeko.
Erreferentzia Marko zabala eta “neutrala” izateak ez du esan nahi, noski, jarduera-ildo jakin bati
jarraitzen ez dionik. Marko hau proposatzean, Europako Kontseiluak ez ditu baztertu 1. kapituluan
azaldu diren printzipioak, ezta Ministroen Batzordeak herrialde kideetako gobernuei egindako R
(82)18 eta R(98)6 gomendioak ere.
• 4. eta 5. kapituluetan hizkuntzaren edozein erabiltzaile edo ikaslek hizkuntza horren beste erabiltzaile
batzuekin komunikatzeko behar dituen ekintzak eta gaitasunak aztertzen dira bereziki.
• 6. kapituluak garapen hori bideratzeko behar diren gaitasunak lantzeko moduak azaltzen ditu.
• 7. kapituluan atazek hizkuntza baten erabileran eta ikaskuntzan duten zeregina sakon aztertzen
da. Hala ere, oraindik aztertzeke gelditzen dira ikuspegi eleanitza eta kulturanitza hartzeak dakartzan
azken ondorioak. 6. kapituluan, beraz, gaitasun eleanitzaren garapena eta izaera aztertuko
dira;
• 8. kapituluan aztertuko da xeheago gaitasun horrek hizkuntzen irakaskuntzaren dibertsifikazioan
eta hizkuntz politiketan duen eragina.
2.4 Ebaluazioa
Dokumentu hau “hizkuntzen ikaskuntza, irakaskuntza eta ebaluaziorako Europako Erreferentzia
Marko bat” da. Orain arte, hizkuntzaren erabilerari eta hizkuntzaren erabiltzaileari erreparatu zaie, eta
horiek irakaskuntzan eta ikaskuntzan dituzten ondorioei.
9. kapituluan, azken kapituluan, Erreferentzia Markoak ebaluazioari buruz duen zeresana azalduko
da. Kapitulu horretan Markoa erabiltzeko honako hiru modu nagusi hauek aipatzen dira:
1. Azterketen eta proben edukia zehazteko.
2. Ikaskuntzako helburu bat lortu den ala ez zehazteko irizpideak finkatzeko; bai ahozko zein idatzizko
saio zehatz baten ebaluaziorako helburuak, bai irakasleak, ikaskide batek edo norberak
ebaluazio jarraitua egitearekin zerikusia duten helburuak lortu diren jakiteko irizpideak finkatzeko.
3. Probetan eta azterketetan hizkuntza baten gaitasun-mailak deskribatzeko; horri esker, egiaztagiri-sistema
desberdinak alderatu ahal izango dira.